BUWET MUNILET TE DABUH PERIN DIRI MUEDET oleh Dr. Joni MN, M.Pd, B.I.

BUWET MUNILET TE DABUH PERIN DIRI MUEDET

"Sa ilet Mupelet; nantin tuahmu"

Iletni kati mupeletke kerna buwet i wasa pegomoh, pecogah, pelutus, cogah so lutusi ini, gomohi so cogahi ini. Tos bual ku so tos bual ku ini, nge bual i bubuh miyen beje e. Ike ini ilen buwet gere dalih i perin diri muedet, si sedihe miyen i cecerake ku jema we tergolong sebagai orang-orang yang beriman.

Perbuweten "ilet" ni sebenare muasaliyah, geh ni perbuweten ini ari pegomoh, renye kucogah, sawah ku lutus (pelutus) inile kelas-kelas ni ilet. Perbuweten ini gere mumetih tue, mude, rawan atawa banan ke diye si ku kudukni gati kite depeten. Ara i keluarga, i kampung, renye wan ton buwet. Jema si mera munilet buwete ke sanah pe alasen ne jelas jema gere jujur, biyer pe i arapte besemiyang we.

Perbuweten munilet ni mayo ku wan "madu ni edet" nge i pantang ni edet a buwet ini mera ku mara, geh bele mejen sawahe bedegub mera lagu penyakit berwusenpe., berarih-arih cumen penengep-engep. Bele ini le si perin tetue jemen "mupelet". Bele ini mera lagu penyakit, mera geh ku diri ni jema wa sipet ujub, tekabur, riye rum temaah, atawa bele-bele si len.

Buwet ilet ni si kudukni mutamah gati renye dele si mubuwetne miyen. Deba i perin ne cogah mamfaat renye i perin ne ike tujun ne ku si jeroh gere mukunah, beta kene. Perbuweten munilet ni gere ara si jeroh apalagi perine mamfaat jarak oya selo ara munilet mamfaat. Buwet munilet ni pemulo e pe nge mu 0m-0m, besisu-sisu, cerite mu kekelop lagu i resiyen buweta, pedahal buwet ta buwet morum ahire pasti betih jema we.

Ilet si lagu nini langkah ini gati nge kite depeten si heran tekok kite si mu buwet ne ni le jema si i tuwen, renye si kite engon semiyange pe sawah tungkuke, renye jema ni seharuse we nge ki cunto muripte çumen oyale conto si osahe munilet, i kemuduk ni ari oya i akui ye diriye muedet. Jema-jema si lagu ini le si geh bele "mupelet"

Mupelet ni oya uwah ni sipet munilet, bele ini ara si regem penyakit, ara si siyel, ara celaka renye si kotek-kotek len. Ike nge ara buwet ilet oya renye ku gomoh-gomoh si len-len pe. Si jelas buwet ini gere ara ku si jeroh, nge pasti ahir ku si gere jeroh mera ku karu atawa rusak rasik beluhe. Entimi i perin diri muedet ike mera ilen munilet.

Atas ke diye sekulahmu, naru ke diye perjelenenmu, dele ke diye sen mu, teridah jeroh ke ilen semiangmu, bierpe pane ko munemah do'a, tue ke perumuren mu ike ilet ilen perbuweten mu gere ilen oya, ike tuah si geh kase oyale "mupelet". Oyakati tetue-tetue pudahna ku si jema lagu nini perine "nantin tuahmu" sa ilet mupelet".

Enti mi tue cerak ike mera ilen ilet. Biyerpe ko nge tue ike mera ilen pegomoh, pecogah, pelutus oya tetap ku ilet ilen beluhe, penyakit berwusen si sawah kase ku jema si lagu nini. Gere ara si jeroh atas nama ilet, oya bewene manut ku kala jemer.

Tue, mude, rawan banan, agihmi oya i teduhen mi madihne. Gere ku si jeroh ahire ike ilet ku rusak kase beluhe. Ike bentuk materi (bene atau sen) si kite ileti ini le geh penyakit berwusen ku diri, ku keluarga atawa ku anak-anake. Enti tuduhi jema atau len-len ike ara penyakit geh atawa bele len si geh. Nge mi oya enti gara-gara si tikik rusak si dele. Enti munafek i wan awah ceraken ku jema gelah muedet i kemuduk ni ari oya dabuh we munilet. Ara buwet atawa pembagien dabuh pe0m-0m.

Nge mi oya entah porami, lang, suawi, mingu arap so beluh te ku benasa bewene, selain ari jeroh gere ara len oyawe si mehate. Kati penyakit, selisih bele, jarak seteru sekalien bise. Agih si nge munge genap si belem. Nge ya dalih ilet gere jeroh oya penyakit kase geh.

Ditulis oleh Ama Dr. Joni MN, M.Pd, B.I.

Ketua STIT Al-Washliyah Aceh Tengah