GERE GENAP ORUM AKAL NI KERO ENTI DEWE NEH BOH oleh Dr. Joni MN

Buwetni sana kati muterkuk mejen sawah mutumpel isi ni kuren ne. Meh kedelene munengkam maksud pikiren si ujud tenulisen ara si ujud cerak pe, i tengkame orum kenak diri ye, renye orum akal ni patal. Gere si kemeli mungune bermajelis besikunen, buwet barang nge mu ratus deba nge muribu pe tun ne.

Barang ni hek muningkupi ye kena si delen ne meh bereberen, ara si nge mutanom, ara si nge manut renye deba nge murenem rum mutelnom. Betul kite empue, betul ari kite asale, tape barang ni gere i masante ara e jelas ni kite pe ari awah ku awah. Sebeb ike mah tenah si berupe cerak meh kedelene mutetamah, entimi kemel enti renye ara pemikiren "gengsi mungune" renye terih perin jema ogoh, gere yoh, enti mah kenak diri mumaknai barang mokot si ben demu, kati enti mutamah osop, mutamah gere jelas.

Bewene ara carae kati tangkuh minyake si perlu pedeh i osan ku si ahli ye, te ike men dedeme oya ku kabur pemeluhen, numele kena kite empu e renye bebewene kite betih entimi kemel ike betul gere betih, kati sekulah i one ara carae kune kin cara mungenali sana keta tujun maksudte, kune cara muningkupi ye, kune cara mungorukiye keta ike si mutelnom so pe kune cara munelupi ye.

Bewene ara cara osah Tuhen liwet si sekulaha. Munetah barang si mu-ebet turah berarih si kerna oya nge ari awah ku awah, ara miyen mayo pemikiren si tukang kunah orum munosah tenah (minselne buku si judule; "Nasehat-nasehat Snouck Hurgranje"). Dele i kunahne ter maksud si tersiret i wasni makna wa demu maksud si tujune mumecah belah.

Enti mah nesu diri, enti orum mukekarat renye sarami enti orop mumuterni betiken munetahi barang diri. Orum cara, orum alat oya ara alate nume orum gengsi. Sebeb Snouckni jema cerdas pora madihne musiyer oya mukunah meh bewene kiteni, mera dewe sesabe dirinte.

Oya ike nge galip pededewe, mah birah mata nye galip pe aku-aku, aku we si mumetih, a enti i harap neh Oya mera Gayo ni taring basa. Sebeb meh kedelen ne narang ni kati rusak ke kerna dele tu si pepanen renye si mubuwet ne si we was a we (urang diri), kemel we i perin gere mubetih atawa gere pane, renye i pepanen, ling ni jema si cecerak keta si empu ni ceraka gere i seseder, nge i tunung tapas ni jema dabuh jilo.

Gelah morum lagu lepat mususun bilang belo gere genap orum akal ni kero, gere le bewene si besekulahni kin tumpit si kekamang i wan rum so, ara ilen pakea pe si bebetul mera munetah gere galak ate we petetiro cumen mera we ku wan lah ni ume so. Segermi mudemu makna rum maksud ni peri, ling rum cerak si nge mokot taring gere genap orum akal ni kero ara alat orum cara e masing-masing, enti sawah osop renye kabur segele e gegara nunung konsef ni Snouck

Si gatin ne gere der kite, kite geli atente kin pemikiren ni Snouck cumen buwet te oya le si kenaki Snouck a, te galip dewe sesabe diri, mugerantang, mumuter betiken, cerak kekuah si tangkuh, besikoteken, pedahen si kaji barang diri we, dabuh keruh, si keruh pe orum sesabe diri we.

Nge agihmi oya ulaken mi diri enti besikoteken sesabe diri, enti dewe sesabe diri, enti dalih i pakek tetulok rum jejari ike oya sara kujema meh kedelene ku diri, boh morum musara mi kite Gayo ni enti neh ara mu uken toa, enti neh ara mu bur paluh enti neh tunung pengaruh ni Snouck oya belene si mumecah belah, pake oya galak pedeh ate we munengon kite bedewe keruh sesabe dirinte.

Ditulis oleh Dr. Joni MN, M.Pd, B.I

Ketua STIT Al-Washliyah Tkn