SABUT TIMUL ATU TELAM ( pesan tersirat ) Edisi murni Berbahasa Gayo , Mengkaji diri

Edisi Murni | Berbahasa Gayo | Mengkaji Diri

SABUT TIMUL ATU TELAM

(Pesan Tersirat)

Dr. Joni, MN, M.Pd, B.I

Bunge ni petukel gere sawah ten mokot paling opat lememe lime lo we, meh oya layu ruluh, dele we bunge ruluh mutik boruk. Bunge ni petukel i akui ye diri e "aku le paling", kuyu pe geh i ruluh ne ulung ni kayu, geh timul ulen bintang, kemuduk ni oya layu ruluh bunge ni petukel pe.

Kemang ni bunge e nge rengiep lagu gere sawah ruluh neh sentan kite engon. Bunge ni petukel ni ike wan gelep pe teridah we kin kuning e, ku son miyen tangkuh ulen 14, oya penengon nte ku bunge a lagu mutamah mubiner.

Ulen 14 telam,... timul bintang 7 ike kene pake serap so perin ne Bima star. Ike nge sawah masa ni bintang ini timul, ijo ni langit pe nge sawah persehe, penengonte lagu gere ara muemun item tikik pe.

Munengon ijo ni langit orum caya ni ulen kemuduk ni ari oya geh kuyu beremus mugerak ni ulung kayu, dele ulung si ruluh si kerna emus ni kuyu si gere kerastu, munengon aku ku pucuk ni batang kayu, dele ulung si nge kuning, orum tampuk e pe nge muloi item reman, ketape we temetap ilen kunul iwan cabang ranting bierpe nge engkip i sagupi lumut orum kayu nalu.

Munengon ku tuyuh dele ulung si tengah ijo ruluh, deba si ruluh nge metuh ku atas ni bunge kuning ni petukel, deba ulung si ruluh nge munutupi renggiep ni caya kuninge, deba ulung si ruluh metuhe jarak ari batang, si delen ne lagu i parinne i atas ni kerpe, oya bewene nge jelas kin beje ni bumi.

Langit ijo si bertawir caya rengiep sesuk e pe gere betiang, mata ni lo, ulen bintang si bercaya gantung pe gere betali merawe osop-osop telas, bier pe nguk i tangak cumen gere tebuh i jejak. Si kunul mutumpuk orum mutempek atas ni bumi atas teridahe, mejen ike kite sesuk rum pejejik i pucuk e teridah kucak si tuyuh kite panang, beta we si ari tuyuh so pe, nengon renye mumanang ku atas ni pucuk e, cumen gere teridah kin talu kirep pe, teridah pe kite gere, enti mulo kin kirepe.

Ike kuneh pe atase bur oya, beluh kite kone sawah ku pucuk e ya miyen, ton ne tetap we i tuyuh ni tapak. Bunge ni terpuk mujadi cekala wan ulen 14 geh ni bintang 7 layu mi bunge petukel. Kuyu beremus munampis ni ulung kayu ku so kini te rupen bewene kin beje ni bumi ku son miyen te rupen jeroh pedeh kin beje ni kupi.

Enti esot kuso gerak ku ini, bebewene si wan dunie ni ara we arti rum gune e. Gipi pelo-oh besikoteken sesabi diri, enti galip i ceraken ini kotek so belangi, ike mera we kite lagu noya, lede pe geh we bebari mungengong, koro kude kaming pe turah ikot we orum tali. Enti bersi esoten ko ku so aku kini, dalih putihi bedak sawah lopak ku salak diri. Gere daleh lomes jerohi salak kemuduk ni oya ate mukeri, si paling belangi pedeh nggeh kene muyang datunte pudahna: idesi untung tungkuki nasib ulaken ku diri, enti tanyor ni si kaya kin tanyor ni si gemade.

Jalu, tomah, jangkit, upet-sisu, gelahmi i taringen enti neh ara i diri, si kerna oya buet ni laya si palis mumagan ku diri, gati i pakati ye kite ari kemiring kiri. Ulaken mi si meserita ku punce diri e. Gelah muninget kite kin dedalu rupen kayu asal gerupel pe dene ku serge, ike kuneh pe caya e, atas e, rebung ni pucuk e, belangi ni bunge e sawah we pasti ku masa e, ike kuneh lo hari pe, serinen, sebet, sudere ama, rum ine, bik beta pe ike sabut timul atu pasti telam,

Kati kuet bange kite boh gelah musara nanguk mi kite morum musara peluk mi bange urang Gayo ni. Besi-tempuhen kite, ebti besisekuten sesabe dirinte, isi ara si ceda e gelah besitegahen kite, ike benar e pe keta gelah bersipapahen morum kite, gelah jarak bang ari kite sipet ni laya palis orum belis kemali. Enti galip besitipak dagun kite orum kite, jema si mujalu kite rerenye maju, ...ni kite galip sesabi diri dor wan upet jalu, si dewe i pe reta diri, ni kite gere sanah pe demu si ara ton te rerenye kuduru., ike dor lagu ini murah pedi jema mu belah bersi e kite rum kite. Mubilangen we kite...Jeroh orum besijerohen mi bange oya we si mehate.

IMG : Dr. Joni berbicara

Bayakmi ate ni suderenku, serinenku, abang, aka, engi, ama, ine'ngku...bayak bajungku urang Gayo bewene....

==================================

"BUGE MUKAMUL MUSARA MI BANG GAYO KU

SEDIH PEDI LE SEMANGAT RUM ROH NI MUYANG DATUNTE MONGOT PESESINGUK MUNENGON KITE KUMPU ORUM CICITE NGE GALIP BESITIPAK DAGUN SESABI DIRIE"

``````````

================================

TIADA HAL YANG MUSTAHIL BAGI ALLAH SEMUANYA MAHLUK DAN SEISI DUNIA INI SIPATNYA TIDAK KEKAL ADANYA HANYA SEMENTARA.

JAUHILAH DARI SIPAT SALING SALAH- MENYALAHKAN APALAGI MENDIKOTOMI, MENGAKUI HANYA KITA SAJA YANG BENAR. PERLU DIINGAT TIDAK ADA YANG LEBIH BENAR, INDAH DAN BAIK SELAIN DARI ALLAH SWT.

```````````````

Oleh Dr. Joni, MN, M.Pd, B.I

*Ketua STIT AL-Washliyah Takengon Aceh Tengah

*Linguis

*Pemerhati dan Akademisi Budaya Gayo