NGADUT WAN BERAWANG KUCAK ( Joni MN )

oleh Dr. Joni MN, M.Pd, B.I

Lengkung ni gelas si kerna jentik, i wan berawang kucak kona ni kepras, mejen sempat si teger kisip munyamarni mata ni kik. Berawang kucak wihe pe bekona, sengkaken i rerak mulo baro sowahen wak-wakene.

Si mu-nama tanggil rum rebetik biasa pengonane ni pukat harimau i lut kolak so, penegune pe sawah bekunce-kunce. Kering lut mujadi kampung geh le jema munyesuk ni umah si kerna sebeleme empit keta ngenaki luwes, nyanya boh buge demu temas. Si kerna nge biasa begule i wan lut kolak si gere teridah tepi e, sekunce si biasa penegune oyape gere murasa, i sara ketike surut le wih ni lut, oyale ngenali temas ku berawang munekik renye mejen muneldik wan kulem si kucak orum berawang si pesit.

Si kerna pengonan ni rebetik rum tangil roa tulu mejen sawah ku pitu, gile we pe kune kolak ni berawang keta oyale we penemeh ni kul ni gule we, kenak ni si tukang kik ari wan berawang ni nguk kona iken peri rum iken paus. I kemudukni ari oya miyen ni se kenak ne penegune seger langki a sawah ku begating keta roa atawa tulu padanga madihne, ini nesue penuwet ne.

Ari kerna gere sebere, tikiktu pelangkin, i mahe le jele kadut, turun le renye tulu jema ku wan berawang kucak rum nin si muperluh. I kemang le jele kadut, i tegu le renye naru e nge tumung ari ujung ku ujung, kolak e pe nge dis rum kul mi berawang. I tegu le renye, seger tegu, oya pesit, perluh, ulung ni kayi si nge kin beje ni berawang, sepot, rum si len-lena oyape mulangkum meh penyangkan ni jele kadut ne, gelis gere ara si taring nontok ilang pe meh i sarene ku deret, akhire nin oyane taring angko-angko rum sesut mi oyape nge muserme i sagi ni wak-waken.

Dr. joni MN, M.Pd, B.I

Tinggal di Takengon

Dosen di STIT AL-WASHLIYAH TAKENGON