Enti dewe sesabi diri Oleh Dr. Joni, MN, M.Pd, B.I

Inget-inget sebelem kona, hemat jimet wan tengah ara. 

Dok. channel Albar Gayo

    Kite i harapen ni ari muyang datunte pudahna boh enti geratah, enti gebah-gebih, enti ling musesorah, enti riye tekabur, ujub temaah. Murip  gelah mu-tape ikot. Ike ini ara i kite, gere kase kiteni sawah bersitulak dekin, gere besijorengen, gere kase sawah porol mujadi usi, gere kase tejem ku jema tumpul ku diri. 

    Kiteni bebewente i harapen muyang-datunte rum jema tuente pedeh ari pudahnami, boh enti ara geratah sediken becerak, enti ara terjah orum empah ike sanah pe buwet. Gelah mutape ikot sediken wan tengah ara, boh kite ni sediken: (1) wan tengah mureta, enti tuang buluh, lagu si gere meh, (2) wan tengah ara umur, gelah munafaat kin jema dele, enti renye umur ni meh-meh beta gere mutenaringen, (3) wan tengah mude, enti olok tunung galak, enti run ni jema kin run te, gelah i betihi diri, (4) i wan tengah jeger-jeger, gelah i pergunen sehate a ku si jeroh, enti renye sawah tanyor ni si kaya kin tanyor ni si gemade. Gelah i ingeti manat petenah ini kati enti kite mubelah bersi, enti galip mungoteken sesabi diri, enti sawah koteken so tatangen ini, buge kite enti sawah muripte rere. Boh bersienumen, bersitunungen, bersirasan, besitegahen, mi kite rum kite, oyale Gayo. 

    Sebelem bere mujadi rara sebelem dul mayo ku mata, boh gelah jeroh sentung ni utema, enti sawah bentor i tunu i atan dapur lebuh. Enti i dekaten penangang ku kucing, enti sawah taring i sagi dapur.

    Bibir gelah betikel ipon pe gelah bebelide. Luahen cerak gelah bepingang i sawahen peri keta gelah bebulang, kati Tuhen munurun ni kasih sayang ku kite, ukum pe gere sawah bele. 

    Jege i peri i gelungen mulo cerak kati sana pe si amat nguk kin jimet,  ike gasut ulaken tir ku elangen, ike ara si mubaji selang enti renye tir mugerancang, i sidik sasati mulo, kati enti kite sesabi dirinte besisekuten, bersiewiten, enti sawah kite mubelah bersi orum enti sawah musirang orum sudere diri, oya gere neh ara artiye bulang si atan ulu orum pingang si atan awak. Ningetmi miyen kite kin ling ni anan-awan te pudahna, ike koro keta ara mutungkelen, ike perau keta ara musakaten, kusonen miyen mas pe keta we berpuro.

ditulis oleh Dr. Joni MN, M.Pd, B.I

*Ketua STIT Al-Washliyah Takengon

*Linguis asal gayo

Kerenem ni Gayology Gayology merupakan disiplin ilmu yang mengkaji tentang kegayoan

Berbagi :