IKE MU-EDET PERSEH JEROHE oleh Dr. Joni MN, M.Pd, B.I.

  Muripni turah bersiamiken, turah besitonanen, turah besitegahen, renye miyen gelah besienomen. Enti sawah murip te ni besitipak dagunen, mutuke lengkong, besisingkulen, besiempiten, besikoteken, besiewiten, renye miyen besidukunen (tube i so i bele seribui ini, i ugahen so, i ukusen ini).

   Murip si paling muliye, gelah besitunungen gelah besikulen, enti galip munos baji selang, enti galip munos jumpun wan pulo renye munos kelah wan terbong, enti...enti agihmi oya i redenmi oya, gere ku jeroh oya, ike oya ara ilen wan ate rum pikiren te ko-eh kite ilen, berarti kite gere ilen mayo ku si mununung Nabinte Muhammad SAW. Nggeh kene Nabinte ike lagu si atas a ilen perbuwetente berarti kite gere ilen mumengen penejeren ni Nabinte alias gere muedeb,

   Gere muedeb ni oya nge jelas gere muedet. Si gere muedet ni si murip kune kenak e, gere teratur, si sakit te we kendiri e mungakui ike we nge muedet. Te rupen jema si mera peaku-aku ni rupen jema si mumerin diri e hebat (muedet) i kemuduk ni ari iya rupen we si gere muedet ta, sebeb ike we muedet gere le mera we berbuwet terjah, empah, keliling rum juge, renye galip peaku-aku.

   Jema si muedet oyale jema si edeb ku sonen miyen oyale keta jema si jeroh, si gere mera mudekati perbuweten madu ni edet, i jaraki e sumang, jema wa gere mera jis, gere mera jengkat, renye i jege ye pedeh ari buwet-buwet kemali. Ini tene-tene jema muedet. Gere mera we lagu musang pulut, keta ike jema banan pe gere mera buwete nge korik pedatas.

   Jema jeroh oyale jema muedet. Jema si betul-betul umet ni Nabinte Muhammad SAW oyale jema si muedet. Jema muedet ni jema si akhlak ke jeroh gere mera mumecah ni time rebek, ate e pe gere ara mutuke lengkong, niyet ni segele e oya bewene si kerna Allah, jema jeroh ni mera we menegahi si gere jeroha orum cara muedet, gere we munegah i jema orum cara madu ni edet. Jema jeroh ni mera we mumapahni jema, gere renye kena we pane, mureta dele renye jis, jengkat ku jema dele, gere ike si jema jeroh gere mera oya buwet te.

   Muedet - muedeb - jeroh - mu-ahlak belangi - ini le baro nguk i perin beredet atawa jema muedet. Ike mera ilen mubelah bersi, mu-tuke lengkong, munos baji selang entimi i peperi diri muedet, jarak ilen oya ari pel-oh jeroh.

ditulis oleh Dr. Joni MN, M.Pd, B.I.

Ketua Sekolah Tinggi Ilmu Tarbiyah Al-Washliyah Takengon