URANGKU KATI MUNAHMA oleh Dr. Joni MN, M.Pd, B.I.

URANGKU KATI MUNAHMA

Jerkit ni belang nge si lagu teruris langkah,

Ate pukekayo munengon gegoyong munos umah.

I tetah maklumet male nyawahen tenah

Buwet ni juru biye i wan awis isi ye selpah

Beluh murerongko gere berasi-asi

Jangkon so temengen si ini

I kelas benang i tegu ari jejari

Palis tulah gere ara sarape kin usi

I tunung ku si pane muramal

Surem peruntungen gere tekecal

Memejen gere sawah pe senemal

Lesi ni murip peruntungen lagu nge si osop umah ni akal

Memejen juh nge pemikiren lagu baluh wan murip si ara

Si muniro ni pe sawah nge tunel beta kekope geh mejen mara

Akal i pasang kesumpun nge sawah gelana

Ulaken turah Si Sara So boh buge dor wan jege perala

Penejer ni ine ama pudah na boh bebuwet kau gelah jemot

Akal perasat rum ate ku Tuhen gelah muikot

Regang tali gelah jeroh enti sawah i sesemet

I buweten sara buwet enti sawah rengang orot

Ingeti si mipesir pestak osop gelep nge meh gerico

Si osop keta gelah beperah, enti neh lagu mano

Si taringpe boh entahmi keta kite rayi enti daten lagu merek saro

Si ara ni keta gelah pejamuri kati enti sawah mamo

Wo sudere bewene ike uken toa oya nume le Gayo

Wo sudere bewene rata sipet ni Gayo gere le lagu kekap no kero

Wo sudere bewene si ara enti sawah lagu geluni kin pembiyo

Wo sudere bewene boh gelah musara, Akhlak ni insen salah keta be we

Ditulis oleh Dr. Joni MN, M.Pd, B.I

Akademisi Budaya Gayo

Ketua STIT Al-Washliyah Takengon

Kerenem ni Gayology Gayology merupakan disiplin ilmu yang mengkaji tentang kegayoan

Berbagi :