Si nge munge entine ipemudei *catatan Radensyah

Ara pedeh kiteni, nge munge umah amat tukul. Nge beluh gajah iguel daling. Barang si nge mujadi oya sigerlek, iprotes, mien gere tuho kritik, sehinge ahire rusak mien si nge itetah selama ini.

Iwan pakat morom, nume kepentingen moroma i papahi boh kune kati jeroh, tapi kepentingen diri tar arap. Munosah pemikiren nume kati jeroh, tapi muremok ni siara.

Si siperin kite makal, oya mulo model ni tebiet, kusi kite (gayoni) male maju kuarap. Iwan rapat sot samut mumepok dede, nise we sibetul. Ike jema si sifet model ini oya nge payah maju gayo. Gere ara bepikir boh kune kati sebegi seperange. Benar gere ipapahi.

Dele nge sisadar munatang ni gayo, munatang ni marwahte, te daboh oya i eweti. Nge gerepe mubantu, keta sana si nge buet nijema padeh iregei. Kiteni memakin kuarap gere memakin besiregen, tetapi maken bertulak deki bergeli ate. Segermi ike lagu ini we pel’ohte nti harap mera maju kiteni, siara kite ilelengat jema. Siara kediki pake luer kite.

Ike betul kite besekulah, keta gelah lagu besekulaha buet orom cerak. Sana si kin tujun morom oya ipetetah. Nti galep betul diri tar arap. Oya gere muarti kite. Daleh mi atas cita cita ini itu, te kesabe diripe gere ilen besijegen orom besiregenen. Sanah gere tebuet kite oya. Jema so rerenye maju isegele bidang, nikite dewe sabe diri ikuli. Nge mi oya sudere jeroh mikite bewene, ibersihi ate kite ijege maruah dirinte morom-morom kati melie kite orom generasite.

Radensyah

*Konten Kreator

*Alumni STAI Gajah Putih Takengon