Jum'at bersih: Menyucikan Jiwa (2) IKE BETUL MU-EDET-MUAGAMA KETA ENTI KOTEK-RUM BESIKOTEKEN Dr. Joni MN

Jum'at bersih: Menyucikan Jiwa (2)

IKE BETUL MU-EDET - MUAGAMA KETA ENTI KOTEK - RUM BESIKOTEKEN

Muripni Enti dalih pupepengkil, besikoteken sesabe diri, besi-upeten; oyape sesabe diri, kotek ni jema we si teridah kotek diri dabuh i sebui. Jema mu edet ni munetahi si rusak rasik, nume mungaram alias mupecah belah, buwet ni edet nume mungotek ni jema, nume munupet, nume munilet, tapi buwet ni munetah orum cara jeroh, gere orum mugerbuk si nge keruh i keruhi miyen, ike oya buwet, jema taring tingkup, kerna owih nge tiyel kepras, lokot atawa bontok pe nge meh pinungen renye timul, akhire jema taring tingkup

Dep-orum jeroh pe i kotek ni jema we kite, i kenal jema we kotek te, te enti mulo te ha nge memang kotek pel oh te, oya ke nge mukoboh sagi ni awah jema munyerakne. Biasae ike jema wa betul-betul we jeroh gere mera murusak, oya betihe le buwet sesi si kotek rum buwet sesi si jeroh. Ike mera ilen mungotek ni jema, munupet, munilet, mumengkil-pengkil, ngenali kelemahan ni jema we si galaki ye, oyale jema si murusak, oyale jema si kotek. Sebeb ike jeroh we, gere bang mungkin mera i buwet ne si kotek-kotek a.

Jema mera mumuji diri e, i perin diri nge benar, jeroh, nge lurus ini jema ni munesu ku sesara tujunen, ike gere sawah tujun maksudte, oya mera renye murusak munos upet jalu, tomahen ku ini tomahen ku siye, upeten polan ni, upeten polin ni. Perin siye gere jeroh, i perin ini we si hebat, perbuweten si lagu nini nge jelas murusak (ate, perasaan), mera mujadi pemantik penilang ni rara, te jeroh ke kite ya. Tabi, ike dele pe bebacan mu buku agama, delepe ayat rum hadis i apal ko, ike lagu ini ilen buwet, oya ngenal gah pelin oya.

Mumaknai murip orum petunjuk murip ni nume orum nesu diri, renye orum munganggap remeh jema, mumerin jema wa gere mumetih, jema si lagu ini oya we le si gere mumetih, ike betul mumetih i pengene renye i jelasne orum cara jeroh, gere turah niaku si betul renye mongeng, i kuduk ni jema dabuh i upeten miyen jema, te ini si i perin kite mu-edeb rum mumetihi edet, te ke buwet murusak mungotek ni jema we te sana dalih mu agama rum mu-edet.

Murip gelah benar, si perbuweten-perbuweten si salah, si si gere jeroha si larang agama, edet rum peraturen na i taringen enti i dekati pe, enti dalih pepanen, ike gere mumetih mungune, enti cerak ni jema kin cerak te, utok ni jema kin utok te. Kuarapen miyen, buwetni gere genap tengen oya, i bersihi ate, enti ara ko-eh, ujup, tekabur, riye, kotek akal, sombong, angkuh.

Semiang ni fungsi e ke mucegah perbuweten-perbuweten ini sebenare keji rum mungkar, cumen lagu meh kedelen ne fakta perbuweten ni jema seni, misel ne oknum oya si teridah jeroh semiang e, bacanen e pe buku buku agama, i kemuduk ni ari oya buwete munomah ni jema, upet-jalu, ngenali kotek ni jema we buwete, kite menet i perin jema jema berpendidiken rum jema mu-edet, i kemuduk ne ya, buwet lagu gere mu pendidiken rum lagu gere muedet. Perin gere mu edet sakit ate we atawa tersinggung, buwete a modele, bohmi buge nge sawah hat hinge e ulak ku diri e.

Ditulis oleh Ditulis oleh Ama Dr. Joni MN, M.Pd, B.I
Ketua STIT Al Washliyah Takengon